चितवन । चितवनको सौराहामा १४औँ अन्तर्राष्ट्रिय हात्ती दिवस मनाइएको छ । दिवसको अवसरमा यहाँका हात्तीलाई वनभोज खुवाइयो ।
सौराहा र आसपासका निजी तथा सरकारी गरी ६० वटा हात्तीलाई वनभोज खुवाइएको हो ।
युनाइटेड हात्ती सञ्चालन सहकारी संस्थाको आयोजनामा हात्तीको वनभोज कार्यक्रम आयोजना गरिएको हो । संस्थाले हरेक वर्ष हात्ती महोत्सव गर्दै आएको छ ।
हात्तीलाई फलफूल, भेली, उखु लगायतका परिकार खुवाइएको थियो ।
सबै प्रकारका खानेकुरा एकै समयमा सबै हात्तीलाई खुवाउँदा मनोरञ्जन साथै हात्तीले सबै खानाको स्वाद लिन पाउने गरी वनभोज कार्यक्रम राखिएको आयोजकले बताएका छन् । हात्तीलाई काममा मात्र नभई पालनपोषणको पनि सन्देश दिनु कार्यक्रमको उद्देश्य मानिन्छ ।
महोत्सव अवलोकनका लागि पर्यटकको पनि भिड लागेको थियो ।
