केपी ओलीको नेतृत्वको सरकारले लिम्पियाधुरा, लिपुलेक, कालापानीसहितको नयाँ नक्सा जारी गरेसँगै भारतले आधिकारिक धारणा सार्वजनिक गर्नुपूर्व भारतीय मिडियाले प्रोपोगाण्डा वार चलाएका छन् ।
उसै त भारतीय सञ्चार माध्यम अतिरञ्जित समाचार पस्कने कार्यले निकै वदनाम नै छन् ।
नेपालले तथ्यसहित राखेको अडानमा चिनियाँको उक्साहटमा भएको तल्लो स्तरको प्रचारवाजी गरिरहेका छन् । जनतामा अनावश्यक उत्तेजना भड्काउने, नेपाली र भारतीय जनतामा अस्वस्थ संघर्ष चर्काउने कार्य गरिरहेका छन् ।
भारतीय स्थल सेना प्रमुखले पनि कसैको उक्साहटमा नेपालले बोलेको निकै आपत्तिजनक अभिव्यक्ति दिएका छन् । इतिहासलाई बंग्याएका छन् । भारतीय सेना प्रमुखले के कुरा बुझ्नु पर्छ भने नेपालको सीमा रगतले कोरिएको हो । न भारतीय न चीन वा न त कुनै देशको निगाह वा उनको उपहारमा प्राप्त गरेको हो, नेपाल ।
नेपालको सीमा निर्धारण गर्न चीनले नेपाललाई उचाल्नु पर्दैन । वीर पुर्खाले आफ्नै तागतले सीमा निर्धारण गरेका हुन ।
बरु नेपालको भूभाग भारतलाई गुलाम बनाइरहेको अंग्रेजसँगको लडाईमा पराजीत भएपछि सन् १८१६ मा सुगौली सन्धि गरेर खुम्चिएको हो । ब्रिटिशसँग निर्धारण गरिएको यो खुम्चिएको सीमालाई समेत भारतले ७० वर्षदेखि मिचेको तथ्यसहित नेपालले दावी गरेको हो ।
सामरिक, साँस्कृतिक र पर्यटकीय हिसावले भारतले मिचेको लिम्पियाधुरा, लिपुलेक, कालापानीसहितको जमिन निकै महत्वको छ । हुन त कुनै पनि जमिनको आफ्नै महत्व हुन्छ । पुर्खाको रगत र पसिनाले आर्जेको जमिनलाई त्यसै छाड्ने अवस्था हुँदैन ।
कोरोना भाइरसको यो महामारीका बेलामा सीमा विवाद निकालेर भारतीय शासकले नेपाल र नेपालीको विरुद्ध आफ्ना निकट मिडियालाई परिचालन गरेका छन् । आफ्नो आन्तरिक संकटलाई विषयान्तर गरिरहेका छन् ।
भारतमा स्थापित अभिनेत्री तथा नेपाली छोरी मनिषा कोइरालाले देशभक्तिको कुरा गर्दा अनावश्यक भारतीय मिडियाबाट आक्रमण र लाञ्छना खेप्नुपरेको छ । तर, उनी अविचलित आफ्नो अडानमा छिन । नेपाली कांग्रेसका नेता डा. मीनेन्द्र रिजालले नेपालको सीमाबारेमा भारतीय मिडियाको गलत धारणाका विरुद्ध दृढतापूर्वक आफ्नो अडान स्पष्ट पारे । यो निकै सकारात्मक छ ।
नेपाली जनताका कारणले भन्दा पनि विगतमा शासकको आत्मसमर्पणवादी चिन्तन र व्यवहारका कारण नेपालले सधैं हेपिनु परेको हो । केपी ओलीले भारतसँगको सीमाका बारेमा स्पष्ट अडान र त्यसको सुदृढीकरणका लागि गरेको पहल अभूतपूर्व छ । वीर पुर्खाको रगतले कोरेको सीमारेखालाई कायम गर्ने काममा उनले अगुवाइ गरिरहेका छन् । धेरै ठूलो हिस्साको सहयोग र ऐक्यबद्धता छ । ९ जेठ २०७७
झिल्काे डटकम बाट साभार
