चितवन । आगामी असार २८ गते बाट सार्वजनिक प्रदर्शनमा आउँन लागेको फिल्म ‘घर ज्वाइँ’ले प्रचारको लागि अटो रिक्साको प्रयोग गरेको छ ।
फिल्मको बारेमा सबै दर्शकलाई थाहाँ होस् भन्दै निर्माण टिमले प्रोमोसनको कामलाई तीब्र बनाउँदै लगेको छ । प्रोमोसनको काम राजधानीमा मात्र केन्द्रित नभई राजधानी बाहिर पनि नेपाली चलचित्रलाई माया गर्ने दर्शक भएका कारण उनै दर्शकलाई मध्य गर्दै निर्माण टीमले प्रोमोसनको यस्तो शैली प्रयोग गरेको हो ।
शुक्रबार चितवनका बिभिन्न स्थानमा रहेका अटो रिक्साको पछाडि ‘घर ज्वाइँ’ को पोस्टर टाँसेर फिल्मको थप प्रोमोसन गरिएको छ । चितवनको नारायगढको शहिद चोक, चौबीसकोठी,पुलचोक हुँदै पर्सा बजारमा रहेका अटोको पछाडि पोस्टर टासिएको हो। अटो रिक्सा शहर देखी गाउँ गाउँ सम्म पुग्ने साथै सामाजिक सञ्जालको पहुँच नहुने ठाउँमा पनि अटो रिक्साको प्रयोग हुने हुँदा यस्ता किसिमको प्रोमोसन शैलीले सबै बर्गका दर्शकलाई फिल्मको बारेमा सुचना पुग्ने हुँदा निर्माण टीमले यो किसिमको प्रचार शैलीलाई विशेष रूपमा हेरेको हो ।
पछिल्लो समयमा मोफसलमा फिल्मको सेयर कलेक्सन सङ्गै चहलपहल बढ्दै गएको छ । धेरै फिल्मले राजधानी बाहिरबाटै लगानी उठाएका छन्, झनै चितवनको कुरा गर्ने हो भने,धेरै निर्माताको रोजाई चितवन बन्दै गएको छ । फिल्मको व्यापारको हिसाबले चितवन ठूलो आशा लाग्दो स्टेशन हो । यँहाका दर्शकले नेपाली फिल्मलाई माया गर्दै आएका छन् । नयाँ फिल्म चल्दा चासो लिने र फिल्म हेर्दै प्रतिक्रिया दिने र सधैं राम्रा नेपाली फिल्मलाई सहयोग गर्ने चितवनका दर्शक हरेक पल नेपाली फिल्म प्रति सकारात्म नै छन् । चितवनको नारायगढमा तीन वटा फिल्म हल र पूर्वी चितवनको पर्सामा एउटा हल गरी चार वटा हलमा दर्शनको बाक्लो उपस्थितीले फिल्म चल्दा निर्माता को गोजी भरिदिएका छन् ।
यिनै दर्शकलाई मध्यनजर गर्दै चितवनमा पनि ‘घर ज्वाईँ’को प्रचारलाई तीब्र पारिएको छ । चितवन सङ्गै राजधानी बाहिर बुटवल,पोखरा, दाङ, नेपालगन्जमा पनि फिल्मको प्रचारको काम तीब्र पारिदैछ ।
अनिल बुढामगर निर्देशित फिल्म घर ज्वाईँ का निर्माता जनक घर्ती मगर हुन् ।
जिएम मूभीज र एबीएम सिनेमा प्रोडक्सनको ब्यानरमा निर्माण भएको सिनेमालाई सुसन प्रजापतिले खिचेका हुन ।
पूर्वी रुकुम आसपासमा छायांकन गरिएको सिनेमाको कथा पनि निर्देशक अनिल आफैले लेखेका हुन् । उनलाई पटकथा तथा संवाद लेखनमा भने बिनोद खतिवडा र सुभाष कोइरालाले सघाएका छन् ।
‘घरज्वाइँ’मा दयाहाङ र मिरुनाका अलवा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरको अभिनय रहेको छ ।
