दमौली ।  नेपाली कांग्रेसका वरिष्ठ नेता रामचन्द्र पौडेलले जनप्रतिनिधिले उत्तरदायित्वलाई गहन रुपमा लिनुपर्नेमा जोड दिनुभएको छ । व्यास नगरपालिकामा नेपाली कांग्रेसबाट निर्वाचित भएका जनप्रतिनिधिलाई बधाई ज्ञापन गर्न आज आयोजित कार्यक्रममा बोल्दै वरिष्ठ नेता पौडेलले जनप्रतिनिधिका सामु महत्वपूर्ण जिम्मेवारी रहेकाले त्यसलाई पूरा गर्नेतर्फ गम्भीर ढङ्गबाट लाग्न आग्रह गर्नुभयो ।

जनताको चाहना र आवश्यकतालाई ध्यानमा राखेर जनप्रतिनिधिले काम गर्नुपर्ने पौडेलको सुझाव थियो । “जनताको माग र आवश्यकता के हो त्यसलाई बुझेर काम गर्न सके जनप्रतिनिधि सफल हुन्छन्”, पौडेलले भन्नुभयो । पौडेलले राजनीति र विकासलाई सँगसँगै अगाडि बढाउनुपर्ने धारणा राख्नुभयो । विकास राजनीतिको बाटोबाट बाहिर जान नमिल्ने बताउँदै पौडेलले भन्नुभयो, “राजनीतिलाई स्थायी बनाएर विकास अभियानलाई पूर्णता दिनुपर्छ । स्थायी राजनीतिका लागि कांग्रेस सदैव क्रियाशील छ ।” भ्रष्टाचार अन्त्य गरी मुलुकलाई समृद्ध बनाउने अभियानमा लाग्न पौडेलले आग्रह गर्नुभयो ।

कांग्रेस राष्ट्रहितको पक्षमा उभिने पार्टी भएको चर्चा गर्दै पौडेलले देशका लागि सधैँ इमानदारी प्रस्तुत गरिरहेको बताउनुभयो । “केही दलहरु भ्रम छरेर राष्ट्रवादी बन्न खोज्दैछन्, कांग्रेस विगतदेखि नै राष्ट्रहितका लागि समर्पित छ”, उहाँले भन्नुभयो ।

वरिष्ठ नेता पौडेलले नेताले कार्यकर्ताको मूल्याङ्कन गर्ने तर जनताले पनि नेताको मूल्याङ्कन गर्नुपर्ने टिप्पणी गर्नुभयो । नेताको चरित्र बुझेर को सही को गलत छ भन्ने कार्यकर्ताले मूल्याङ्कन गर्नुपर्ने पौडेलले बताउनुभयो । सो अवसरमा व्यास नगरपालिकाका नवनिर्वाचित नगरप्रमुख बैकुण्ठ न्यौपाने, उपप्रमुख इन्दिरा दरैलगायत विभिन्न वडाका अध्यक्ष, कार्यपालिका सदस्य र सदस्यलाई बधाई ज्ञापन गरिएको छ ।-रासस

प्रतिक्रिया दिनुहोस !