नेपालगञ्ज ।  बाँकेको नरेनापुर गाउँपालिकामा फरक भूमिका रहेका ३५ वर्षीय अजयकुमार मिश्राको परिचय अहिले फेरिएको छ । कार्यालय सहयोगीका रुपमा काम गर्दै आउनुभएका उहाँ अहिले जनता समाजवादी पार्टी (जसपा) का तर्फबाट उक्त गाउँपालिका–३ को वडाध्यक्ष निर्वाचित हुनुभएको हो ।

मिश्राले गाउँपालिकामा नेकपा एमालेका ताजमोहम्द खाँ र नेपाली कांग्रेसका राजकुमार मौर्यलाई हराएर ६५४ मत ल्याउनुभएको थियो । उक्त गाउँपालिकामा कार्यालय सहयोगीको रुपमा कार्यरत मिश्रा यस पटकको स्थानीय चुनावमा जनप्रतिनिधिको रुपमा निर्वाचित भएपछि गाउँ टोलका समस्या समाधान गर्न व्यस्त हुनुहुन्छ । ‘मैले दमकलमा काम गर्दा जनताको समस्या भित्रबाट बुझने अवसर पाए, त्यपछि मलाई जनप्रतिनिधिको रुपमा काम गर्ने चाहना पलायो’ उहाँले भन्नुभयो । कोरोनाकालमा जनतालाई आपत पर्दा होस् वा बाढीपीडित हुँदा गरेको कामबाट प्रभावित भएर जनताले आफूलाई वडाध्यक्षमा निर्वाचित गरेको मिश्राले उल्लेख गर्नुभयो ।

“ गरिब भए पनि कसैलाई केही प¥र्यो भने मबाट हुने सबै काम हुन्छ” उहाँले भन्नुभयो । आफू कार्यालय सहयोगी हुँदा र अहिले जनप्रतिनिधि हुँदा कुनै अन्तर नभएको उल्लेख गर्दै जसरी पनि जनताको सेवा गर्ने कुरा हो मिश्राले भन्नुभयो । दश जोड दुईसम्मको अध्ययन गर्नुभएका उहाँका दुई छोराछोरी र श्रीमतीका साथै परिवारमा बाआमा, दाइ, भाउजुसमेत छन् ।

“हामीले अझै कार्यपालिकाको चुनाव सकेका छैनौँ त्यसैले त्यो काम सकेपछि बैठक बसी योजना निर्माण गरेर काम गर्छौ” वडाध्यक्ष मिश्राले भन्नुभयो । नरेनापुरमा शुक्रबार मात्रै कार्यपालिकाको निर्वाचन हुदैछ । उक्त गाउँपालिकाका अध्यक्ष इश्तिहाक अहमद साहले उहाँ समझार व्यक्ति भएको उल्लेख गर्दै जनताले रुचाएको जनप्रतिनिधि भएको टीप्पणी गर्नुभयो । “मैले उहाँलाई सर्पोट पनि गरे र जनताको भरोसा र विश्वासले मिश्रा वडाध्यक्षमा निर्वाचित हुनुभयो,” उहाँले भन्नुभयो । अहिले विगतको तुलनामा नरेनापुरको शिक्षा, स्वास्थ्य, बाटाघाटा सहज भएको उल्लेख गर्दै अध्यक्ष साहले दुःखको जिन्दगी बिताएका नरेनापुरवासीका सुखका दिन आएका छन् भन्नुभयो ।

पहिले विद्युतको पहुँच पनि थिए तर अहिले अधिकांश स्थानमा त्यसको पनि व्यवस्था गरिएको छ अध्यक्ष साहले भन्नुभयो । नेपालगञ्जबाट पूर्व–दक्षिण दिशामापर्ने नरेनापुर पुग्न करिब दुई घण्टा लाग्छ । साविकका छ गाविस मिलेर बनेको नरेनापुर गाउँपालिकामा ३४ हजार ९४२ जनङ्ख्या छ । इस्लाम र हिन्दू धर्मवलम्बीको बाहुल्यता रहेको सो पालिकामा कृषि नै जीविकोपार्जनको मुख्य आधार हो । यसलाई दुर्गम गाउँपालिकाकाको रुपमा समेत चित्रण गरिएको छ ।-रासस

प्रतिक्रिया दिनुहोस !