काठमाडौं । नेपाली कांग्रेसका नेता डा. शेखर कोइराला र महामन्त्री गगन थापा भरतपुरमा सत्ता गठबन्धनले आयोजना गर्ने चुनावी सभामा सहभागी नहुने भएका छन् ।

गठबन्धनको स्थानीय चुनावी संयन्त्रले कोइराला र थापाको समेत तस्बिर राखेर प्रचार सामग्री बनाए पनि पूर्वनिर्धारित कार्यक्रमहरूमा व्यस्त रहेका कारण कोइराला र थापा भरतपुर नआउने भएका हुन् । कोइराला र थापा भरतपुर जाने निधो नभए पनि गठबन्धनको स्थानीय संयन्त्रले दुवै नेता आउने भनी प्रचार गरेको थियो ।

कांग्रेसले निर्धारण गरेको केन्द्रीय चुनावी सभाको तालिकामा पनि भरतपुरको सभामा सभापति शेरबहादुर देउवा, वरिष्ठ नेता रामचन्द्र पौडेल र सहमहामन्त्री डिना उपाध्याय सहभागि हुने उल्लेख छ ।

आजै चितवन कांग्रेसका सभापति राजेश्वर खनालले कोइरालालाई फोन गरी भरतपुर आउन अनुरोध गरेका थिए । कोइरालाले पूर्वनिर्धारित कार्यक्रमहरूमै व्यस्त रहेकोले अपर्झट भरतपुर आउन असमर्थ रहेको भन्दै सभा सफलताको कामना गरेका छन् । चुनावी अभियानका लागि कोइराला विराटनगरमा रहेका छन् ।

महामन्त्री थापा भने आफ्नै निर्वाचन क्षेत्रमा रहेको बूढानीलकण्ठ नगरपालिकाको घरदैलोमा व्यस्त छन् ।

प्रतिक्रिया दिनुहोस !