काठमाडौं । नेपाल विद्युत प्राधिकरणका प्रबन्ध निर्देशक कुलमान घिसिङले आफ्नो जानकारीबेगर माओवादीको चुनावी पोस्टरमा आफ्नो तस्बिर प्रयोग भएको बताएका छन् । तस्बिर हटाउनका लागि आफूले माओवादीलाई आग्रह गरिसकेको उनले जानकारी दिए ।

संक्षिप्त कुरा गर्दै घिसिङले भने, ‘मलाई यो विषयमा सोधिएको थिएन । सञ्चारमाध्यममा आएपछि थाहा पाएको हुँ । मेरो फोटो हटाउन आग्रह गरिसकेको छु ।’ माओवादीले तत्काल आफ्नो तस्बिर हटाउने उनले विश्वास व्यक्त गरे ।

आज माओवादी अध्यक्ष पुष्पकमल दाहाल प्रचण्डको पेजबाट माओवादीको नयाँ चुनावी पोस्टर सार्वजनिक गरिएको थियो । पोस्टरमा ‘अँध्यारोबाट उज्यालोको यात्रा’ भन्दै प्रचण्ड, जनार्दन शर्मा र कुलमान घिसिङको तस्बिर राखिएको छ । पोस्टरमा माओवादीको चुनाव चिह्नसहित ह्यासट्यागमा ‘भोट फर सीपीएनमाओइस्ट’ लेखिएको छ ।

प्रतिक्रिया दिनुहोस !