भक्तपुर । नेकपा एमालेका अध्यक्ष केपी शर्मा ओलीले पाँच दलीय सत्ता गठबन्धनलाई एक/एक किलोका ढकको संज्ञा दिनुभएको छ । नेकपा एमालेचाहिँ सिंगै एक क्विन्टलको ढक रहेको भन्दै अध्यक्ष ओलीले एक एक किलोको पाँच वटा ढकले केही गर्न नसक्ने बताउनु भयो ।

व्यवसायी तथा नेकपा एमालेका केन्द्रीय सदस्य दुर्गा प्रसाईंले बुधबारबाट भक्तपुरको सूर्यबिनायकमा सञ्चालनमा ल्याउनु भएको तरकारी बजार उद्घाटन गर्दै ओलीले यस्तो बताउनु भएको हो । ‘कतिपय साथीहरूलाई लाग्न सक्छ गठबन्धन गरेका छन्। अप्ठेरो पर्न सक्ला भनेर,’ ओलीले भन्नुभयो, ‘मैले भन्ने गरेको छु यदि एउटा तराजुमा एक/एक किलोका पाँच वटा ढक एकातिर राख्नुभयो र क्विन्टलको ढक अर्कातिर राख्नुभयो भने के हुन्छ ? नेकपा एमाले क्विन्टलको ढक हो। पाँच वटा भनेका एक/एक किलोका ढक हुन्।’

ओलीले अब कुनै पनि पार्टीले एक्लै एमालेसँग लड्छु भन्ने कुरा नचिताए र नसोचे हुने तथ्य राख्नुभयो । ‘त्यसैले गठबन्धन गर्न जरूरी छ। एमालेसँग लड्न सकिँदैन भनेको ठिक छ। गठबन्धन गरेरै आउनुपर्छ। साह्रै बच्चा भयो भने गाह्रो हुन्छ। निहुरेर लडाइँ गर्नुपर्छ। कुम-कुममा खुट्टा राखेर पाँच जना आए त निहुरिन परेन,’ उहाँले भन्नुभयो, ‘लोभी पापीहरूको गठबन्धन कति गाह्रो होला ?’

उहाँले गठबन्धनमा विवाद हुन्छ भनेर एकैदिनमा उम्मेदवारी गर्न सकिँदैन भनी निर्वाचन आयोग गुहारिरहेको बताउनु भयो । गठबन्धनले दुई दिनसम्म मनोनयनको दिन राख्नुपर्ने भनिरहेको ओलीको भनाई थियो । ‘कहिल्यै भएको थियो दुई दिनसम्म मनोनयनको समय राखेको ?,’ ओलीले भन्नुभयो, ‘उहाँहरूले गठबन्धनबिना लड्न सकिँदैन भनेको ठिक छ। गठबन्धन गरेर पनि एमालेसँग सकिँदैन भन्ने बुझ्न बाँकी छ।’

प्रतिक्रिया दिनुहोस !