चितवन । शैक्षिक परामर्श सेवा दिँदै आइरहेको एक्सपर्ट एजुकेशन एण्ड भिजा सर्भिसेस चितवनले जस्तोसुकै विपद्को बेला सहयोगी भूमिका निर्वाह गर्दै आइरहेको छ । बाढी, पहिरो होस् या महाभूकम्प हरेक विपद्मा हातेमालो गर्दै पीडितको घाउमा मलम लगाउँदै आइरहेको छ । यसपटक विश्वव्यापी माहामारीको रुपमा फैलिएको कोरोना भाइरस (कोभिड–१९) संक्रमणले नेपालमा अक्सिजनको हाहाकार भइरहँदा एक्सपर्टले अक्सिजन सिलिण्डर खरिद गरेरै सहयोगी भूमिका निर्वाह ग¥यो । अहिले एक्सपर्ट फाउण्डेशन मार्फत एक्सपर्टले देशका सबै शाखा मार्फत ५० वटा अक्सिजन कन्सट्रेटर सहयोग गरिरहेको छ । जसमध्ये चितवन शाखालाई ७ वटा अक्सिजन कन्सट्रेटर प्राप्त भएको थियो । ती मध्ये ५ वटा वितरण गरिसकेको छ भने बाँकी दुई वटा उपकरण छिट्टै विकट ठाउँमा वितरण गर्ने तयारीमा छ । पाँच वटा अक्सिजन कन्सट्रेटर एक्सपर्ट चितवनले जिल्लाका दुई अस्पताल, मकवानपुरका २ स्वास्थ्य चौकी र नवलपरासी पूर्वका एक अस्पताललाई अक्सिजन कन्सट्रेटर सहयोग गरेको छ ।

चितवनको माडी नगरपालिका अन्तरगतको बघौडा अस्पताल, इच्छाकामना गाउँपालिका अन्तरगतको दारेचोक स्वास्थ्य चौकी, मकवानपुरको कैलाश गाउँपालिका अन्तरगतको नामटार स्वास्थ्य चौकी र मकवानपुरगढी गाउँपालिका अन्तरगतको स्वास्थ्य चौकी र नवलपरासी (बर्दघाट सुस्ता पूर्व)को हुप्सेकोट गाउँपालिका अन्तरगतको देउराली प्राथमिक अस्पताललाई अक्सिजन कन्सट्रेटर सहयोग गरिएको एक्सपर्ट चितवनका प्रवन्ध निर्देशक डिल्लीराम अधिकारीले जानकारी दिए ।
प्रवन्ध निर्देशक अधिकारीले माडी नगरपालिकाका मेयर ठाकुर प्रसाद ढकाल र बघौडा अस्पतालका चिकित्सक आलोक कुमारलाई सो सामग्री हस्तान्तरण गरे । यस्तै इच्छाकामना गाउँपालिकाकी अध्यक्ष गीता कुमारी गुरुङ, मकवानपुरको कैलाश गाउँपालिकाका अध्यक्ष टंक मोक्तान, मकवानपुरगढी गाउँपालिकाका अध्यक्ष विदुर हुमागाईँ र नवलपरासी पूर्व हुप्सेकोट गाउँपालिकाकी अध्यक्ष लक्ष्मीदेवी पाण्डेलाई प्रवन्ध निर्देशक अधिकारीले सो सामग्री हस्तान्तरण गरे । हस्तान्तरण कार्यक्रममा एक्सपर्ट चितवनका लेखा प्रमुख किरण पौडेललगायत शाखाका प्रमुख व्यक्तिहरुको उपस्थिति रहेको थियो ।
ती सबै स्वास्थ्य संस्थाहरुलाई एक÷एक थान १० लिटर क्षमताको अक्सिजन कन्सट्रेटर सहयोग गरिएको हो । यसले अक्सिजन आवश्यक पर्ने बिरामीलाई तत्कालै अक्सिजन दिन मद्धत पुग्ने छ । सघन कक्षमा उपचार गर्न पर्ने बिरामी बाहेकलाई यसै कन्सट्रेटरबाट सहजै अक्सिजन प्रदान गर्न सकिन्छ । ग्रामिण भेगका स्वास्थ्य संस्थाहरुमा यस्तो सुविधा नहुँदा धेरैले अकालमै ज्यान गुमाउन बाध्य छन् । सोही अवस्थालाई मध्यनजर गर्दै एक्सपर्टले उपकरणको अभाव भोगिरहेका स्वास्थ्य संस्थाहरुलाई सहयोग उपलब्ध गराएको हो । ‘अक्सिजनको अभावमा ज्यान गुमाउन नपरोस् भनेर ग्रामिण स्वास्थ्य संस्थालाई सहयोग गरेका हौं’ एक्सपर्ट चितवनका प्रवन्ध निर्देशक डिल्लीराम अधिकारीले भने ‘माहामारीको बेलामा मात्र होइन, अन्य बेलाका बिरामीहरुले पनि सहज उपचार पाउनेमा आशाबादी छौँ ।’
सामग्री ग्रहण गर्दै माडी नगरपालिकाका प्रमुख ठाकुरप्रसाद ढकालले श्वासप्रश्वास समस्या भएका बिरामीलाई अतिआवश्यक पर्ने अक्सिजन कन्सट्रेटर सहयोग गरेकोमा एक्सपर्ट परिवारलाई धन्यवाद ज्ञापन गरे । उनले सदरमुकामबाट टाँढा रहेको अस्पताललाई सहयोगका लागि सम्झिनु आफैमा महत्वपूर्ण रहेको भन्दै मेयर ढकालले सामान्य जनता बसोबास गर्ने ठाउँलाई छनोट गरेकोमा धन्यवाद दिए । व्यवसायिक धर्म मात्र नभई समाजसेवा पनि कर्तव्य ठानेर कर्तव्य बोध गर्दै सहयोग गरेकोमा मेयर ढकाल खुशी प्रकट गरे ।
त्यस्तै इच्छाकामना गाउँपालिकाकी अध्यक्ष गीता कुमारी गुरुङले जिल्लाको एक मात्र गाउँपालिकामा आएर महत्वपूर्ण सामग्री सहयोग गरेकोमा एक्सपर्ट परिवारलाई धन्यवाद ज्ञापन गरे । कोरोना माहामारीको बेलामा गाउँपालिका आफैले अस्थायी आइसोलेसन सेन्टर स्थापना गरेर जनताको सेवा गरेको स्मरण गराउँदै पूर्वाधार निर्माण र उपकरणका लागि अझै सहयोग आवश्यक रहेको बताइन् । गतवर्ष भन्दा यसवर्ष बढी गाउँपालिकामा माहामारीले प्रभावित बनाएको भन्दै यस्तो बेला सम्झिएर अक्सिजन कन्सट्रेटर सहयोग गर्नु मानविय कार्य भएको बताइन् । उनले गाउँपालिकाले छिट्टै स्तरीय स्थायी अस्पताल बनाउने प्रक्रियामा लागि परेको जानकारी दिइन् ।
यस्तै अक्सिजन कन्सट्रेटर ग्रहण गर्दै मकवानपुरको कैलाश गाउँपालिकाका अध्यक्ष टंक मोक्तानले माहामारीसंग लड्न र अन्य समयमा पनि बिरामीलाई सहज उपचार पाउनका लागि अक्सिजन कन्सट्रेटरले महत्वपूर्ण सहयोग गर्ने बताए । उनले यही सामग्रीले कैलाशका जनताको ज्यान जोगाउन सहयोगी बन्ने भएकाले एक्सपर्टलाई सिंगो गाउँपालिकाको तर्फबाट धन्यवाद ज्ञापन गरे । उनले गाउँपालिकाकाले प्रत्येक स्वास्थ्य चौकीमा अक्सिजनसहितको सेवा दिने तयारी गरिरहेको बेला यो सहयोगले थप हौसला मिलेको बताए ।
त्यस्तै अक्सिजन कन्सट्रेटर ग्रहण गर्दै मकवानपुरगढी गाउँपालिकाका अध्यक्ष विदुर हुमागाईँले अक्सिजन कन्सट्रेटरको पूर्ण रुपमा सदुपयोग गरिने बताए । उनले गाउँपालिका भित्र २ सय भन्दा बढी कोरोना भाइरस संक्रमित फेला परिसकेको भन्दै अक्सिजनको आवश्यकता अझै उत्तिकै रहेको बताए । उनले यस सामग्रीले अक्सिजन आवश्यक पर्ने बिरामीलाई गाउँपालिका भित्रै उपचार गर्नमा सहयोग मिल्ने भन्दै सहयोगका लागि एक्सपर्ट परिवारलाई धन्यवाद दिए ।
यस्तै अक्सिजन कन्सट्रेटर ग्रहण गर्दै नवलपरासी पूर्व हुप्सेकोट गाउँपालिकाकी अध्यक्ष लक्ष्मीदेवी पाण्डेले युवाहरुलाई विदेशमा सही शिक्षा पाउने गरी परामर्श दिँदै आएकोसंस्थाले स्वास्थ्य क्षेत्रमा समेत टेवा पु¥याएकोमा खुशी व्यक्त गरिन् । सहयोग सामग्रीले गाउँपालिकाका विपन्न जनताले सहज उपचार पाउने वातावरण बनेको भन्दै एक्सपर्ट परिवारलाई धन्यवाद व्यक्त गरिन् । उनले युवाहरुको यस्तै सक्रियता बढ्दै गए हरेक क्षेत्रको विकासमा सहयोगी भूमिका निर्वाह हुने बताइन् ।

प्रतिक्रिया दिनुहोस !