काठमाडौं । नेपालमा ‘कालो ढुसी’ को संक्रमण भेटिएपछि स्वास्थ्य तथा जनसंख्या मन्त्रालयले सतर्क रहन आग्रह गर्दै एड्भाइजरी जारी गरेको छ । भारतमा ‘ब्ल्याक फङ्गस’ भनिने कालो ढुसीबाट हजारौं मानिस संक्रमित भइसकेका छन् । कोभिड निको भएका विरामीहरुमा यो रोग देखिएको छ ।

मन्त्रालयले रोगका लक्षण, रोकथामका विधि र संक्रमण भए आइसोलेसनमा रहेर गर्नुपर्ने कार्यबारे एड्भाइजरीमा उल्लेख गरेको छ । कोभिड-१९ भएर निको भएका विरामीहरुमा आँखा, नाक र अनुहार विगार्ने जस्ता समस्याहरु देखा परेको मन्त्रालयले जनाएको छ ।

नेपालमा हाल कालो ढुसीको संक्रमण विरलै देखिएपनि संक्रमण गम्भीर भए प्राणघातक पनि हुनसक्ने स्वास्थ्य मन्त्रालयले जनाएको छ । यो रोग घातक भएकाले स्वास्थ्य सम्बन्धि मापदण्ड अपनाउन जरुरी रहेको जनाइएको छ ।

कालो ढुसी भएका मानिसहरुमा सामान्य यी देखा पर्ने लक्षणहरु

अनुहार, मुख, नाक, आँखा वरिपरि दुख्ने
आँखा र नाक सुन्निने, रातो हुने वा दुख्ने
नाकबाट रगत बग्ने, बाक्लो सिँगान आउने
ज्वरो आउने
आँखाको ढकनी सुनिने, ढकनी झुक्ने, आँखा धमिलो देखिने
दाँत दुख्ने वा हल्लिने
यी मानिसहरुमा उच्च जोखिम हुने सम्भावना हुन्छ

कोभिड–१९ उपचारका क्रममा स्टेरोइड प्रयोग गरेका व्यक्तिहरु
चिकित्सकको सल्लाह बिना एन्टिबायोटिक वा अन्य औषधिको जथाभावी प्रयोग गर्नेहरु
मधुमेह भएका वा शरीरको रोग प्रतिरोधात्मक क्षमता कमजोर भएकाहरु

घरमा आइसोलेसनमा बस्दा अपनाउन सकिने रोकथामका उपायहरु

सफा र सुख्खा माक्स प्रयोग गर्ने, डिस्पोजेबल मास्कको पुनः प्रयोग नगर्ने
नियमित रुपमा हात धुने वा स्यानिटाइजरको प्रयोग गर्ने
व्यक्तिगत सरसफाईमा ध्यान दिने
घर बाहिर वा फोहोरमा काम गर्नु परे डिस्पोजेबल पन्जाको प्रयोग गर्ने
धेरै धुलो भएको र ओसिलो ठाउँमा नजाने
नुुनिलो पानीले नाक सफा गर्ने
पोभिडोन आयोडिन भएको तरल पदार्थले घाँटी र मुख कुल्ला गर्ने
मधुमेह भएका विरामीले सुगर नियन्त्रणमा राख्ने
स्वास्थ्यकर्मीको सल्लाहमा मात्रै औषधी प्रयोग गर्ने

प्रतिक्रिया दिनुहोस !