काठमाडौँ । अक्सिजनको कोटा निर्धारण गर्ने सरकारको निर्णयमा आपत्ति जनाउदै नेपाल मेडिसिटी अस्पतालले कोभिडका नयाँ बिरामी भर्ना नलिने घोषणा गरेको छ ।

अस्पतालले मंगलबार एक विज्ञप्ति जारी गर्दै सीसीएमसीले निर्धारण गरेको कोटाले नयाँ बिरामी भर्ना गरेर उपचार गर्न नसकिने जनाएको हो ।

सीसीएमसीले अक्सिजनको वितरण प्रभावकारी बनाउन मेडीसीटी अस्पताललाई दैनिक १ सय अक्सिजन सिलिण्डर कोटा निर्धारण गरेको थियो ।

‘प्रत्येक दिन ४ सय पचास देखि ५ सय अक्सिजन सिलिण्डर आवश्यक पर्नेमा नेपाल सरकारबाट १ सय सिलिण्डरमात्र प्राप्त हुने जानकारी प्राप्त भएकाले छ ।’ अस्पतालका मेसु तथा प्रवक्ता डा राज राणाले विज्ञप्ति जारी गर्दै -‘ १०० थान सिलिण्डरले कुनै पनि हालतमा उपचार गर्न सम्भव नहुने भएकाले कोभिड १९ संक्रमणका जटिल स्थितीका बिरामीहरुको नयाँ भर्ना लिन अस्पताल असमर्थ रहेका छौं ।’

अस्पतालले अक्सिजनको सहज आपूर्ति गर्ने व्यवस्था मिलाउन नेपाल सरकार स्वास्थ्य तथा जनसंख्या मन्त्रालय, सिसिएमसी र सम्बन्धित निकायहरुसँग हार्दिक अपिल गरेको छ ।

प्रतिक्रिया दिनुहोस !