काठमाडौं । भारत सरकारले नेपाललाई अनुदान स्वरूप दिने १० लाख डोज कोरोना भाइरस विरुद्धको खोपको पहिलो खेप आज काठमाडौ आउँदै छ ।

आज बिहान एयर इन्डियाको विमानबाट कोरोना भाइरस विरुद्धको खोपको पहिलो खेप त्रिभुवन अन्तर्राष्ट्रिय विमानस्थलमा आइपुग्ने छ । विमानस्थलमा नेपालका लागि भारतीय राजदूत विनयमोहन क्वात्राले स्वास्थ्य मन्त्रालयलाई खोप हस्तान्तरण गर्नेछन् ।

ती खोपलाई टेकुस्थित स्वास्थ्य सेवा विभागमा भण्डारण गरिनेछ । स्वास्थ्य सेवा विभागबाट प्रत्येक प्रदेशको भण्डारण केन्द्रमा खोप पठाइनेछ ।

स्वास्थ्य तथा जनसङ्ख्या मन्त्रालय र भारतीय राजदूतावासले बुधबार काठमाडौँमा संयुक्त पत्रकार सम्मेलन गरी आज पहिलो खेप आइपुग्ने भएपनि आगामी केही दिन भित्र सबै खोप काठमाडौँ आइपुग्ने जानकारी दिएको हो ।

पत्रकार सम्मेलनमा स्वास्थ्य तथा जनसङ्ख्या मन्त्री हृदयेश त्रिपाठीले उपलब्ध खोप स्वास्थ्यकर्मी, सुरक्षाकर्मी, शव व्यवस्थापन तथा सरसफाइमा कार्यरत कर्मचारी लगायतलाई उपलब्ध हुने बताउनुभयो ।

मन्त्री त्रिपाठीले कोरोना विरुद्धको खोप खरिद तथा प्रयोगका लागि आवश्यक कानुनी तथा प्रशासनिक प्रक्रिया पुरा भइसकेको र खोप प्राप्त भएपछि तुरुन्तै खोप अभियान सञ्चालन हुने बताउनुभयो ।

मन्त्री त्रिपाठीले नेपाल सरकारले कूल जनसङ्ख्याको करिब ७२ प्रतिशत जनसङ्ख्यालाई खोपयोग्य जनसङ्ख्याको रूपमा पहिचान गरी आवश्यक खोप खरिद गर्ने तयारी गरिरहेको र खरिद प्रक्रिया छिट्टै सुरु हुने पनि बताउनुभयो ।

कार्यक्रममा नेपालका लागि भारतीय राजदूत विनय मोहन क्वात्राले कोरोना विरुद्धको लडाई जित्नका लागि सबै राष्ट्रहरूबीच द्विपक्षीय तथा बहुपक्षीय सहकार्य आवश्यक रहेको बताउनुभयो ।

राजदूत क्वात्राले कोरोना महामारीको सुरुवात देखिनै नेपाल र भारतबीच आवश्यक सहयोग एवं सहकार्य हुँदै आएको र महामारीको अन्त्य सम्म सहकार्य जारी रहने बताउनुभयो ।

प्रतिक्रिया दिनुहोस !