प्रचलित :

काठमाडौं । प्रधानमन्त्रीका प्रेस सल्लाकार सूर्य थापाले जनता समाजवादी पार्टीले हालै जारी गरेको विज्ञप्तिप्रति ध्यानाकर्षण भएको भन्दै विज्ञप्तिमा उल्लेख गरिएको भाषा र केही अंशप्रति आप्पती जनाउनुभएको छ ।

विज्ञप्तिमा सम्माननीय प्रधानमन्त्रीप्रति लक्षित आक्रमण अत्यन्तै अशिष्ट र पूर्वाग्रही र दुराशयपूर्ण र खेदजनक रहेको उल्लेख छ ।
राज्यका जिम्मेवार तहमा रहनुभएका प्रधानमन्त्रीमाथि पटक पटक आफूलाई सुशिक्षित भनेर चिनाउन रुचाउनेहरूबाट यस किसिमको तल्लो स्तरको टिप्पणी आउनु भनेको कुण्ठाग्रस्त मगजको परीणाम भन्दै उहाँले यस स्तरको अपसंस्कारको प्रदर्शनबाट कहाँ पुगिन्छ हेक्का राख्न सम्बन्धित पक्षलाई आग्रह गन्नुभएको छ ।

‘राजनीतिमा विवाद, मतभेद र असहमतिहरू हुन्छन्, जसलाई स्वाभाविक नै मानिन्छ । त्यसै आधारमा यस स्तरको अपसंस्कारको प्रदर्शनबाट कहाँ पुगिन्छ ? सम्बन्धित व्यक्ति र पक्षहरूले नै हेक्का राख्नु श्रेयष्कर होला’, थापाको प्रेस नोटमा उल्लेख छ ।

विज्ञप्ति मार्फत उहाँले राजनीति तबरबाट जित्न नसक्नेहरुले नै यस्तो हत्कण्ठा उठाउने दाबी गर्नुभएको छ । ‘सिद्धान्त, नीति र कार्यक्रममा बहस गर्न नसक्ने निरुपाय व्यक्तिहरू नै आफ्नो स्वार्थका रोटी सेक्न नपाउँदा आँखा चिम्लेर अँध्यारो देख्छन् र उज्यालोको भर्त्सनामा जुट्छन् ।’ विज्ञप्तिमा उल्लेख छ ।

विज्ञप्तिमा उहाँले प्रधानमन्त्री विरुद्ध यस्ता गतिविधि अरूबाट निर्देशित कदम, गलत नीति, विचार र व्यवहारको परिणाम भएको भन्दै यस्ता गतिविधिले कोही कसैलाई सफलता नमिल्ने जिकिर गर्नुभएको छ ।

प्रधानमन्त्रीका विरुद्ध यस्ता गतिविधि गर्नेहरू सफल नहुने भन्दै उहाँले ‘सिसाको घरमा बसेर ढुङ्गा हान्नेहरू आफै असुरक्षित र पतन हुने बताउनुभएको छ ।

विज्ञप्तिमा राजनीतिक दलहरूले आफ्ना धारणा र विमति प्रस्ट्याउने गरी सरकारको आलोचना र विरोध गर्न सक्ने उल्लेख थर्दै जिम्मेवार पदाधिकारीविरूद्द प्रयोग गरिने अपमानजनक, तथ्यहीन,भ्रामक र गैरजिम्मेवार भाषाप्रति गंभीर आपत्ति प्रकट गरिएको छ ।

हेनुहोस् पुरै विज्ञप्ति
प्रेस नाेट
‘जनता समाजवादी पार्टी नेपाल’ले हालै जारी गरेकाे विज्ञप्तिकाे एक अंशप्रति गंभीर ध्यानाकर्षण भएकाे छ ।
सम्माननीय प्रधानमन्त्रीप्रति लक्षित विज्ञप्तिमा रहेकाे “…केपी आेली सरकारकाे कुनै ठाेस कार्ययाेजना नरहेकाे र प्रधानमन्त्री शारिरीक र मानसिक दृष्टिले अत्यन्तै कमजाेर रहेकाे…” भन्ने टिप्पणी अशिष्ट र पूर्वाग्रही टिप्पणी अत्यन्त दुराशयपूर्ण र खेदजनक छ ।
पटकपटक राज्यका जिम्मेवार तहमा रहिसकेका र प्रधानमन्त्रीकाे समेत ज़िम्मेदारी सम्हालिसकेका, अझ आफूलाई सुशिक्षित भनेर चिनाउन रूचाउनेहरू संलग्न दलबाट यस स्तरकाे तरिका खासमा कुण्ठाग्रस्त गालीगलाेज मात्र हो र सोचको दिवालियापन नै हाे ।
राजनीतिमा विवाद, मतभेद र असहमतिहरू हुन्छन्, जसलाई स्वाभाविक नै मानिन्छ । त्यसै आधारमा यस स्तरकाे अपसंस्कारकाे प्रदर्शनबाट कहाँ पुगिन्छ ? सम्बन्धित व्यक्ति र पक्षहरूले नै हेक्का राख्नु श्रेयष्कर हाेला ।
सिद्धान्त, नीति र कार्यक्रममा बहस गर्न नसक्ने निरूपाय व्यक्तिहरू नै आफ्नाे स्वार्थका राेटी सेक्न नपाउँदा ऑंखा चिम्लेर अँध्याराे देख्छन् र उज्यालाेकाे भर्त्सनामा जुट्छन् ।
जहाँसम्म प्रधानमन्त्री केपी शर्मा ओलीलाई आलाेचना, विराेध र गालीगलाेज गरिएकाे सन्दर्भ हाे, याे कुनै नाैलाे कुरा हाेइन । आफ्नाे निहीत स्वार्थ पूरा गर्न उहाँलाई बाधक देख्नेहरूले विगत छ दशकयता यसाे गर्दै आएकाे तथ्य स्पष्ट नै छ । त्यस्ता तत्वहरू इतिहासकाे गर्तमा सीमित भइसकेका छन् । अरूबाट निर्देशित कदम, गलत नीति, विचार र व्यवहारले काेही कसैलाई सफलता हासिल हुँदैन भन्ने जगजाहेर छ ।
शीशाकाे घरमा बसेर ढुंगा हान्नेहरू आफै असुरक्षित र पतन हुनु अनिवार्य छ ।
जागृति, चेतना, संस्कार र सदाचारका मानकहरू सम्बन्धित व्यक्तिअनुरूप नै व्यवहारमा अभ्यास गरिने र भिन्नाभिन्नै हुने यथार्थ हरेक समाजका सचेत व्यक्तिलाई अवगत नै रहिआएकाे छ ।
राजनीतिक दलहरूले आफ्ना धारणा र विमति प्रष्ट्याउने गरी सरकारकाे अालाेचना र विराेध गर्न सक्छन् । तर राष्ट्रपति, प्रधानमन्त्री र जिम्मेवार पदाधिकारीविरूद्द प्रयाेग गरिने अपमानजनक, तथ्यहीन,भ्रामक र गैरजिम्मेवार भाषाप्रति गंभीर आपत्ति प्रकट गर्नैपर्छ, जाे सभ्य समाजकाे मूल्य र मानक विपरित रहेका छन् । तसर्थ: जसपाको औपचारिक विज्ञप्तिमा प्रमप्रति प्रयोग गरिएकाे भाषा निन्दनीय रहेकाेतर्फ सम्बन्धित सबैलाई स्पष्ट गर्दछु ।
सूर्य थापा
प्रधानमन्त्रीका प्रेस सल्लाहकार
२७ साउन २०७७

प्रतिक्रिया दिनुहोस !