कोरोना संक्रमण: ६४ हजारको मृत्यु, १२ लाख संक्रमित (कुन देशको अवस्था कस्तो?)

काठमाण्डौ । कोरोना भाइरसले अहिलेसम्म (चैत २३, १२:००बजे) ६३ हजार ८ सय ९४ जनाको ज्यान लिएको छ । त्यसैगरि अहिलेसम्म कुल ११ लाख ८२ हजारभन्दा बढि संक्रमित भएका छन् । संक्रमितमध्ये २ लाख ४४ हजार निको भएका छन् । तर उपचाररत ८ लाख ७४ हजारमध्ये करिब ४२ हजारको अवस्था गम्भीर छ ।

सबैभन्दा बढि संक्रमण फैलिएको अमेरिकामा कुल संक्रमितको संख्या ३ लाख ६ सय पुगेको छ । त्यस्तै एकदिनमै अमेरिकामा २३ हजार ४ सय ६४ जनामा कोरोना संक्रमण भएको पुष्टि भएको छ भने ७ सय ५ जनाको मृत्यु भएको छ ।

अमेरिकामा अहिलेसम्म संक्रमणका कारण मृत्यु हुनेको संख्या ८ हजार १ सय ५७ पुगेको छ । त्यस्तै शनिबारै फ्रान्समा सबैभन्दा बढी १ हजार ५३ जनाको मृत्यु भएको छ भने त्यहाँ संक्रमित हुनेको कूल संख्या ८२ हजार ९ सय पुगेको छ । मर्नेको संख्या ७ हजार ५ सय ६० पुगेको छ ।

सबैभन्दा धेरै मृत्यु इटलीमा भएको छ । इटालीमा एकैदिन ६ सय ८१ जनाको मृत्यु भएको छ भने कूल मृतकको संख्या १५ हजार ३ सय ६२ पुगेको छ । त्यहाँ संक्रमितको संख्या १ लाख २४ हजार ६ सय ३२ पुगेको छ । उता स्पेनमा एकैदिन ५ सय ४६ जनाको मृत्यु भएको छ ।

योसहित स्पेनमा मनेको संख्या ११ हजार ७ सय ४४ पुगेको छ । त्यसैगरि चिनमा मर्नेको संख्या ३ हजार २ सय २६ पुगेको छ । नियन्त्रणमा आइसकेको भनिए पनि चिनमा १९ जना नयाँ संक्रमित भेटिए भने ४ जनाको मृत्यु भएको छ । चिनमा अहिले पनि १५ सय ५८ जनाको उपचार भइरहेको छ । त्यहाँ कुल संक्रमितको संख्या ८१ हजार ६ सय ३९ हो ।

छिमेकी मुलुक भारतमा अहिलेसम्म ३ हजार ८२ जना संक्रमित छन् भने ८६ जनाको मृत्युु भइसकेको छ ।